बीजिंग : चीननेच कोरोनाचा विषाणू तयार केला असल्याचा आरोप अमेरिकेकडून सातत्याने करण्यात येत आहे. याला पुष्टी देणारे वक्तव्य चीनच्याच प्रसिद्ध विषाणूशास्त्रज्ञ डॉ. ली-मेंग यांनी केले आहे. हा विषाणू मानवनिर्मितच असून, आपण लवकरच याबद्दल पुरावे सादर करणार असल्याचे त्यांनी म्हटले आहे. आपण लवकरच एक अहवाल प्रसिद्ध करणार असून, कोरोनाचा विषाणू हा मानवनिर्मित असल्याचा पुरावा देणार असल्याचे त्यांनी स्पष्ट केले.
डॉ. ली-मेंग यांनी चीन सोडले असून, अमेरिकेत आश्रय घेतला आहे. डॉ. ली- मेंग यांनी सांगितले, की कोरोनाचा फैलाव झाला नव्हता, त्यापूर्वीच चीन सरकारला याबाबतची माहिती मिळाली होती. चीन सरकारने आपल्याबाबतची सर्वच माहिती मिटवून टाकली आहे, असे त्यांनी सांगितले. वुहानच्या बाजारातून करोनाचा फैलाव झाला असल्याच्या बातम्या या दिशाभूल करणाऱ्या आहेत.
याबाबत बोलताना डॉ. यान यांनी सांगितले की, वुहानचा मांस बाजार हा एखाद्या पडद्यासारखा वापरण्यात आला आहे. या पडद्यामागे बऱ्याच घडामोडी घडल्या आहेत. हा विषाणू नैसर्गिक नाही. वुहानच्या प्रयोगशाळेतून हा विषाणू बाहेर आला असल्याचाही दावा त्यांनी केला. त्यांनी सांगितले की, जीनोमचा सिक्वेन्स हा माणसाच्या बोटांच्या ठश्यासारखा आहे. या आधारावर त्याची ओळख पटवता येऊ शकते. भक्कम पुराव्याच्या आधारे हा विषाणू प्रयोगशाळेतून आला असल्याचे सांगणार असल्याचे त्यांनी म्हटले.