अंकारा : तुर्कीला काळ्या समुद्रात (Black Sea) ३२० अब्ज क्युबिक मीटर नैसर्गिक वायूचा साठा सापडला आहे. हा नैसर्गिक वायू २०२३ पासून बाहेर काढण्यात येणार असल्याची घोषणा तुर्कीचे राष्ट्रपती रेसेप तैयप एर्दोहान यांनी केली आहे. ग्रीससोबत सुरू असलेल्या तणावाच्या पार्श्वभूमीवर  रेसेप तैयप एर्दोहान यांनी मोठी घोषणा केली आहे. तुर्कीच्या या घोषणेमुळे रशियाची चिंता काही प्रमाणात वाढली आहे. 

तुर्कीला हा नैसर्गिक वायूचा साठा सापडल्यामुळे परदेशांवरील त्यांचे अवलंबित्व कमी होणार आहे. तुर्कीच्या ड्रिलिंग शीप फेथने या गॅसचा काळ्या समुद्रात शोध लावला आहे. राष्ट्रपती एर्दोगान यांनी सांगितले की, आगामी काळात आम्हाला भूमध्य सागरातूनही अशाच प्रकारची चांगली बातमी मिळेल. त्या ठिकाणी तेल, नैसर्गिक वायूचे साठे शोधण्यासाठीच्या प्रयत्नांना आणखी वेग आणणार असल्याचेही त्यांनी सांगितले. तुर्कीला नैसर्गिक वायूचा साठा बाहेर काढण्यासाठी अब्जावधी डॉलरची गुंतवणूक करावी लागणार आहे.

तुर्कीच्या ड्रिलिंग शिप फेथने जुलै महिन्यापासूनच उत्खन्न करण्यास सुरुवात केली होती. याला टूनो-१ असे नाव देण्यात आले आहे. हे ठिकाण काळा समुद्राच्या तुर्की येथील किनाऱ्यापासून १०० नॉटिकल मैल दूर आहे. तुर्कीचे ऊर्जा मंत्री फेथ डोनमेज यांनी सांगितले की, नैसर्गिक वायू साठ्याचा शोध हा नऊ वेळा उत्खन्न केल्यानंतर लागला आहे. त्याशिवाय आणखी साठा असल्याचेही समजते. तुर्कीला नैसर्गिक वायू बाहेर काढता आला तर त्यांना रशियाकडून महाग दरात नैसर्गिक वायू आयात करावा लागणार नाही. त्यामुळेच काही दिवसांपूर्वी एर्दोगान यांनी देशाचा विकासाबाबत भाग्योदय होणार असल्याचे सूचक वक्तव्य केले होते.
सध्या तुर्की नैसर्गिक वायूसाठी पूर्णपणे तुर्कीवर अवलंबून असून, नवीन पुरवठादार देशाच्या शोधात आहेत. मागील वर्षीच त्यांनी जवळपास ४१ अब्ज डॉलरचा नैसर्गिक वायू खरेदी केला होता. तुर्कीने कमी प्रमाणात नैसर्गिक वायू खरेदी केल्यास रशियाला मोठा आर्थिक फटका बसणार आहे.
दरम्यान, सध्या काळ्या समुद्रात मिळालेला नैसर्गिक वायूचा साठा हा तुर्कीच्या अपेक्षेपेक्षा कमी असल्याचा दावा तज्ञांनी केला आहे. याआधी आगामी दोन दशकांसाठीचा वायू साठा सापडला असल्याचा दावा तुर्कीने केला होता. मात्र, याहून अधिक मोठा साठा इजिप्तला मिळाला आहे. इजिप्तला ८५० अब्ज क्यूबीक मीटर एवढा नैसर्गिक वायूचा साठा सापडला आहे.